උණුසුම් කාලගුණ තත්ත්වය හමුවේ මේ වන විට පාසල්වල පැවැත්වෙන ක්රීඩා ඉසව්හිදී වැඩි අවධානයෙන් යුතුව කටයුතු කළ යුතු බව කොළඹ රිජ්වේ ආර්යා ළමා රෝහලේ ශ්වසන රෝග පිළිබද විශේෂඥ වෛද්ය චන්න ද සිල්වා මහතා පවසයි.
උණුසුම් කාලගුණ තත්ත්වය හමුවේ සෞඛ්ය අවදානම් අඩුකර ගන්නේ කෙසේද සහ ක්රීඩා ඉසව් සංවිධානය කිරීමේ දී අවධානයට ලක්විය යුතු කරුණු පිළිබදව ජනතාව දැනුවත් කිරීමේ අරමුණින් අද (13) පස්වරුවේ සෞඛ්ය හා ජනමාධ්ය අමාත්යාංශයේ ප්රධාන ශ්රවණාගාරයේ දී මාධ්ය හමුවට එක්වෙමින් විශේෂඥ වෛද්යවරයා මේ බව පැවසීය.
එහිදී අදහස් දක්වමින් විශේෂඥ වෛද්යවරයා පැවසුවේ පාසල් ක්රීඩා කටයුතුවලදී මෙම තත්ත්වය සැලකිල්ලට ගනිමින් ක්රීඩා තරග අවම කිරීම, සිසුන්ට නිරන්තර විවේකය ලබා දීම, සහ දරුවන් සිසිල් ස්ථානයට යොමු කිරීම මෙන්ම ජලය හෝ ලවන අඩංගු පානයන් ලබා දීම ඉතා වැදගත් බවය.
එහිදී වැඩිදුරටත් අදහස් දැක්වූ විශේෂඥ වෛද්ය චන්න ද සිල්වා මහතා,
"මේ දිනවල පවතින මෙම තත්ත්වය අවම කර ගැනීමට, මෙවැනි තත්ත්වයක් හඳුනා ගැනීමට සහ අවශ්ය ප්රතිකාර ගැනීමට යොමු වීම ඉතාම වැදගත්. විශේෂයෙන්ම ක්රීඩා කටයුතුවලදී පාසල්වල ක්රීඩා කටයුතු උදේ සහ දවල් කාලයේ තියෙන්නේ හැකි දුරට එම තත්වයන් ඉතා තද රශ්මිය පවතින අවස්ථාවකදි විශේෂයෙන්ම 10-1 අතර කාලයේදී පාසල් පවතින කාලයේදී අවම කර ගැනීම, දරුවන්ට නිතර නිතර විවේක ලබා දීම වැදගත්. දරුවනුත් කැමතියි එක දිගට ක්රීඩා කරන්න. නමුත් එම කටයුතු කිසි සේත්ම නොකළ යුතුයි විවේකය වැදගත්. කඩින් කඩ ක්රීඩා කරන අතරතුර ඔවුන්ට විවේකය ලබා දිය යුතුයි. ඔවුන් සිසිල් ස්ථානයකට යොමු කිරීම සහ වැඩිපුර ජලය සහ ලවන අඩංගු පානයන් ලබා දීම, ඔවුන් සිසිල් සෙවන ස්ථානයක රැඳවීම, වැදගත් වෙනවා. මෙන්න මේ තත්ත්වය සිදු නොකිරීමෙන් ශරීරයේ උෂ්ණත්වය වැඩි වීම මගින් විවිධ සංකූලතා එන්න පුළුවන්, ඔවුන්ට ක්ලාන්ත ගතිය, මහන්සි ගතිය, වගේම ශරීර උෂ්ණත්වය වැඩි වෙන්න පුළුවන්. ඒ වගේම මස්පිඩු පෙරලීම වැනි ක්රියාවන් සිදුවෙන්න පුළුවන් වගේම එම තත්ත්වය තවදුරටත් හඳුනා නොගෙන දරුවන්ගේ ශරීර උෂ්ණත්වය සහ තාපය වැඩිවුණොතින් ඉතා සංකීර්ණ සංකූලතා වගේම තාප කම්පන තත්ත්වය දක්වා ගමන් ගන්න පුළුවන් එය සමහරවිට මාරාන්තික තත්ත්වයක් දක්වා ගමන් කරන්න පුළුවන්. යම් කිසි දරුවෙක් තමන්ගේ ක්ලාන්ත ගතිය, මහන්සිගතිය, හිස කැරකැවිල්ල, කල්පනාගතිය පෙන්වනවානම් ඔවුන් ඉක්මනින් තාපය පවතින ස්ථානයකින් අයින් කරලා යම් කිසි සිසිල් ස්ථානයකට අරගෙන ගිහිල්ලා ජලය පානය කිරීමට හැකිනම් එය ලබා දෙන්න. ඒ වගේම මෙම තත්ත්වය තවදුරටත් පවතින්නේ නම් හැකි ඉක්මනින් ළඟම තිබෙන රජයේ රෝහලකට යොමු කිරීම වැදගත්"
